ප්‍රාදේශීය ලේකම් කාර්යාලය - හලාවත

අපගේ මෙහෙවර

රාජ්‍ය ප්‍රතිපත්ති වලට අනුකූලව සේවා සැපයීම, සම්පත් සම්බන්ධීකරණය හා ජනතා සහභාගීත්වයෙන් යුත් කාර්යක්ෂම, තිරසාර සැලසුම් සහගත සංවර්ධන ක්‍රියාවලියක් තුළින් හලාවත ප්‍රාදේශිය ලේකම් කොට්ඨාශයේ ජන ජීවිතය නංවාලීම.

හැදින්විම

හලාවත ප්‍රාදේශීය ලේකම් කොට්ඨාශය වයඹ පළාතේ පුත්තලම පරිපාලන දිස්ත්‍රික්කය තුළ පිහිටා ඇත. එය උතුරින් ආරච්චිකට්ටුව ප්‍රාදේශීය ලේකම් කොට්ඨාශයටද, දකුණින් මාදම්පේ ප්‍රාදේශීය ලේකම් කොට්ඨාශයටද, නැගෙනහිරින් කුරුණෑගල දිස්ත්‍රික්කයේ බිංගිරිය ප්‍රාදේශීය ලේකම් කොට්ඨාශයටද බටහිරින් ඉන්දියන් සාගරයටද සීමාවී ඇත.මෙහි විශාලත්වය වර්ග කිලෝමීටර් 91 කි.

හලාවත ප්‍රාදේශීය ලේකම් කොට්ඨාශයේ ප්‍රධානතම නගරය වනුයේ හලාවත නගරයයි. බටහිරින් සුන්දර වෙරළ තීරයක් සහ පටු කළපු තීරයක් ද,උතුරින් දැදුරු ඔයෙන් ද වට වූ වර්ග කිලෝමීටර් 6.4 ප්‍රමාණයකින් යුක්ත, හලාවත වයඹ පළාතේ ප්‍රධාන නගරයකී. එය උතුරු අක්ෂාංශ 7.35 හා නැගෙනහිර දේශාංශ 79 . 47යන රේඛා එකිනෙක ජේදනය වන ලක්ෂය මත පිහිටා ඇත. හලාවත නගරය පුත්තලම දිස්ත්‍රික්කයේ මධ්‍යයේ පිහිටා ඇත.හලාවත ප්‍රාදේශීය ලේකම් කොට්ඨාශය කොළඹ - පුත්තලම ප්‍රධාන මාර්ගයට මෙන්ම හලාවත කුරුණෑගල - ප්‍රධාන මාර්ගයට සම්බන්ධ වන අතර කොළඹ පුත්තලම දුම්රිය මාර්ගයේ පිහිටීම නිසා කේන්ද්‍රීය වශයෙන් ඉතා වැදගත් ස්ථානයක් උසුලයි.මේ නිසා හලාවත ප්‍රදේශය වෙළෙඳ මධ්‍යස්ථානයක් මෙන්ම නාගරික මධ්‍යස්ථානයක් ලෙස ප්‍රකටව ඇත.

හලාවත ප්‍රදේශය අතිතයේදී මුහුදු තිරය හා පැවති මුතු වර්ග නිසා මුතු හලාවත නමින් ප්‍රකටව තිබුණි. වර්තමානයේ එම සම්පත් නොමැති වුවද වර්තමානයේ ධීවර කර්මාන්තයට හලාවත වෙරල හා කලපුව ප්‍රසිද්ධියක් උසුලයි. හලාවත වෙරළ ආශ්‍රිතව ජීවත් වන ජනතාවගේ ප්‍රධාන ජීවන උපාය මාර්ගය ධීවර කර්මාන්තයයි.එමෙන්ම හලාවත හා ආරච්චිකට්ටුව ප්‍රාදේශීය ලේකම් කොට්ඨාශ වෙන්කරන සීමා මායිමේ පිහිටි දැදුරු ඔය දෑල ප්‍රදේශයේ බහුල වශයෙන් කෘෂිකර්මාන්තය සිදු කෙරේ. මෙම ප්‍රදේශවල ජනතාවගේ ප්‍රධාන ජීවන මාර්ගය කෘෂිකර්මාන්තයයි.ධීවර හා කෘෂිකර්ම ක්ෂේත්‍ර වලින් හලාවත ප්‍රාදේශිය ලේකම් කොට්ඨාශය ජාතික ආර්ථිකයට දායකත්වයන් ලබා දෙයි.

හලාවත ප්‍රාදේශීය ලේකම් කොට්ඨාශය හලාවත මැතිවරණ කොට්ඨාශයට අයත්වේ .එසේම එහි හලාවත නගර සභාවට මෙන්ම, හලාවත ප්‍රාදේශියසභාවට අයත් ප්‍රදේශවලින් සමන්විතව පිහිටා ඇත. මෙම කොටිඨාශය ග්‍රාම නිළධාරී වසම් 49 කින් හා ගම්මාන 88 කින් සමන්විතය. 2016 වර්ෂයේ දත්ත අනුව හලාවත ප්‍රාදේශීය ලේකම් කොට්ඨාශයේ ජනගහනය 70800 කි.මෙහි බහුතරය සිංහල කතෝලික ආගමිකයන් වන අතර සෙසු ජන වර්ග හා ආගම් නියෝජනය කරන ජනතාවද මෙහි වාසය කරති. මේ නිසා හලාවත ප්‍රදේශය බහු ජාතික හා බහු ආගමික සංස්කෘතික පදනමක් ඇති ප්‍රදේශයකි.සුප්‍රකට හින්දු පුදබිමක් වූ ශ්‍රී මුන්නේෂ්වරම දේවාලය හලාවත ප්‍රාදේශීය ලේකම් කොට්ඨාශය තුළ පිහිටා ඇත.